Зацверджаны важнейшыя параметры прагнозу сацыяльна-эканамічнага развіцця Беларусі на 2022 год

  Фота з архіва 9 снежня, Мінск /Кар. БЕЛТА/. Прэзідэнт Беларусі Аляксандр Лукашэнка 9 снежня падпісаў указ нумар 481 "Аб важнейшых параметрах прагнозу сацыяльна-эканамічнага развіцця Рэспублікі Беларусь на 2022 год". Аб гэтым БЕЛТА паведамілі ў прэс-службе кіраўніка дзяржавы. Дакумент выдадзены ў мэтах забеспячэння стабільнасці ў грамадстве і росту дабрабыту грамадзян і вызначае важнейшыя параметры прагнозу сацыяльна-эканамічнага развіцця краіны на 2022 год. У прыватнасці, рост валавога ўнутранага прадукту запланаваны ў памеры 102,9 працэнта да ўзроўню бягучага года, рэальных наяўных грашовых даходаў насельніцтва - 102 працэнты, інвестыцый у асноўны капітал - 103,3 працэнта. Чакаецца, што экспарт тавараў і паслуг вырасце на 6,3 працэнта да ўзроўню 2021 года. Нацыянальнаму банку сумесна з Саветам Міністраў даручана прыняць неабходныя меры па абмежаванні ў 2022 годзе інфляцыі на ўзроўні 6 працэнтаў. Урад у двухмесячны тэрмін зацвердзіць мэтавы план сацыяльна-эканамічнага развіцця Беларусі на 2022 год, які забяспечвае поўную мабілізацыю рэсурсаў эканомікі для дасягнення пастаўленых VI Усебеларускім народным сходам мэт. Пры гэтым павінны быць захаваны ўсе параметры, якія забяспечваюць макраэканамічную збалансаванасць. БЕЛТА