У Беларусі пачалі распрацоўку электроннай бібліятэкі. Яна стане адзінай платформай у сферы культуры

  28 мая, Мінск /Кар. БЕЛТА/. У Беларусі распрацоўваецца электронная бібліятэка, якая стане адзінай платформай у сферы культуры. Аб гэтым у YouTube-праекце БЕЛТА "Па факце: рашэнні Першага" расказаў генеральны дырэктар Нацыянальнай бібліятэкі Вадзім Гігін. "У праграме дзейнасці ўрада на 2025-2029 гады ў раздзеле "Культура" электронная бібліятэка стаіць на першым месцы. Мы стартавалі. Пачалі стварэнне праграмнага забеспячэння. Гэта будзе не проста такая бібліятэчная інфармацыйная сістэма, а платформа для ўсёй галіны культуры", - адзначыў Вадзім Гігін. Паводле яго слоў, ёсць меркаванне, што стварэнне электроннай бібліятэкі прадугледжвае выключна алічбоўку кніг і дакументаў, каб іх можна было чытаць з дапамогай любога гаджэта. "Гэта не зусім так. Гэта аб'яднаная бібліятэчная інфармацыйная сістэма. Вядома, яна прадугледжвае алічбоўку. Але яна не заменіць чытальную залу нават у такім віртуальным аспекце", - сказаў генеральны дырэктар Нацыянальнай бібліятэкі. Вадзім Гігін расказаў, што цяпер Нацыянальная бібліятэка Беларусі захоўвае каля 10,5 млн кніг і дакументаў. Плюс тут знаходзяцца матэрыялы Нацыянальнага архіва. "А ўлічваючы, што да Нацыянальнай бібліятэкі далучылі і Кніжную палату, наш агульны фонд дасягае амаль 16 мільёнаў экзэмпляраў", - падкрэсліў ён.-0-