Сацыяльныя задачы, кантроль за фарміраваннем рынку энергарэсурсаў. Сергяенка аб задачах саюзных парламентарыяў

  12 снежня, Масква /Эдуард Півавар - БЕЛТА/. Старшыня Палаты прадстаўнікоў Нацыянальнага сходу Беларусі, першы намеснік старшыні Парламенцкага сходу Саюза Беларусі і Расіі Ігар Сергяенка 12 снежня ў Маскве на сесіі Парламенцкага сходу назваў асноўныя задачы, якія стаяць перад саюзнымі парламентарыямі, перадае карэспандэнт БЕЛТА. "Мы павінны і ў далейшым рабіць канкрэтныя крокі па развіцці шматпланавага супрацоўніцтва, прадоўжыць практыку правядзення "ўрадавай гадзіны", ажыццяўляць парламенцкі кантроль за забеспячэннем роўных правоў грамадзян Беларусі і Расіі, суб'ектаў гаспадарання, фарміраваннем адзінага рынку энергарэсурсаў, мадэрнізацыяй прамысловасці, стварэннем новых тэхналогій і ўстараненнем астатніх перашкод у двухбаковым гандлі", - сказаў Ігар Сергяенка. На яго думку, саюзным парламентарыям мэтазгодна таксама прадоўжыць работу па падрыхтоўцы мадэльных заканадаўчых актаў, ажыццяўляць доўгатэрміновае планаванне, выпрацоўваць агульныя падыходы да забеспячэння харчовай бяспекі і рацыянальнага імпартазамяшчэння. "Пры гэтым нельга зніжаць увагу да тэм сацыяльнай накіраванасці, якія хвалююць насельніцтва, - падкрэсліў Ігар Сергяенка. - Як паказала праведзеная мінулай восенню бягучага года ў Магілёве "ўрадавая гадзіна", у нас ячшэ ёсць сур'ёзны патэнцыял для супрацоўніцтва ў галіне аховы здароўя, які мы абавязаны задзейнічаць для абароны інтарэсаў грамадзян, забеспячэння роўных правоў і магчымасцей". Ён паведаміў, што ў цэнтры ўвагі сённяшняй сесіі - бюджэт Саюзнай дзяржавы на 2025 год. "Хацелася б адзначыць дадатную дынаміку росту даходнай часткі за кошт павелічэння ўзносаў дзяржаў у апошнія гады. У 2024 годзе ўзносы павялічаны на 38 працэнтаў, у 2025 годзе выраслі яшчэ на 15 працэнтаў. Мяняецца структура бюджэтных расходаў у бок павелічэння фінансавання мерапрыемстваў Саюзнай дзяржавы. Так, у мінулым годзе фінансавалася 37 мерапрыемстваў, у гэтым годзе ўжо 41. Дзякуючы зладжанай сумеснай рабоце дэпутацкага корпуса, Пастаяннага камітэта і кантрольных органаў змяншаецца прафіцыт саюзнага бюджэту. Паводле ацэнкі фінансістаў, у ходзе выканання бюджэту ў 2025 годзе прафіцыт будзе цалкам размеркаваны", - звярнуў увагу Ігар Сергяенка. "Усё гэта ў сукупнасці стварае добрыя перадумовы, каб бюджэт Саюзнай дзяржавы на наступны год стаў дзейсным інструментам для рэалізацыі запатрабаваных праектаў і праграм", - рэзюмаваў ён.-0-