На нарадзе ў Лукашэнкі абмеркавалі эканомію бюджэтных сродкаў

  16 сакавіка, Мінск /Кар. БЕЛТА/. Эканомія бюджэтных сродкаў стала тэмай нарады ў Прэзідэнта Беларусі Аляксандра Лукашэнкі, перадае карэспандэнт БЕЛТА. "Тэма сённяшняй размовы - эканомія бюджэтных сродкаў. І не толькі бюджэтных. Калі мы часам эканомім бюджэтныя сродкі, то з'яўляюцца, як у савецкія часы іх называлі, нейкія падснежнікі. То мы людзей недзе трымаем на вытворчасці, а яны працуюць на бюджэтныя арганізацыі. То мы выкарыстоўваем транспарт небюджэтных арганізацый і выкарыстоўваем гэты транспарт для вырашэння пытанняў бюджэтнага характару. Ну а дакладней, ніякія пытанні не вырашаюцца ў бюджэтным плане, а начальнікі патрабуюць аўтамабілі з падпарадкаваных прадпрыемстваў дзяржаўнай і прыватнай формы ўласнасці, каб вырашаць нейкія асабістыя пытанні. Гэта па той інфармацыі, якую я атрымліваю апошнім часам", - сказаў Прэзідэнт. Аляксандр Лукашэнка яшчэ раз падкрэсліў, што размова ідзе аб эканоміі сродкаў. "Вядома ж, перш за ўсё бюджэтныя сродкі. Іх трэба накіроўваць туды, куды трэба. Гэта грошы народныя. Прадпрыемствы іх плацяць, і людзі падаходны падатак плацяць. Гэта народныя грошы. І гэтыя грошы павінны выкарыстоўвацца на патрэбы нашых людзей", - заявіў кіраўнік дзяржавы. У ліку ўдзельнікаў нарады кіраўнік спраў Прэзідэнта Юрый Назараў, кіраўнік Адміністрацыі Прэзідэнта Ігар Сергяенка, старшыня Камітэта дзяржкантролю Васіль Герасімаў, віцэ-прэм'ер Пётр Пархомчык, губернатар Мінскай вобласці Аляксандр Турчын і міністр фінансаў Юрый Селіверстаў.