Галоўчанка: транспартны комплекс Беларусі ўстойліва працуе ў няпростых умовах

  Раман Галоўчанка 2 лістапада, Мінск /Кар. БЕЛТА/. Транспартны комплекс Беларусі ўстойліва працуе ў няпростых умовах. Аб гэтым заявіў прэм'ер-міністр Раман Галоўчанка ў час пасяджэння Прэзідыума Савета Міністраў на тэму "Аб функцыянаванні транспартнага комплексу ў 2021 годзе і планах на 2022 год", перадае карэспандэнт БЕЛТА. "Ужо другі год транспартны сектар працуе ў няпростых умовах, звязаных як з эпідэміялагічнай сітуацыяй, так і з пэўнымі знешнімі фактарамі. Тым не менш транспартны комплекс устойліва выконвае асноўныя паказчыкі сацыяльна-эканамічнага развіцця, уключаючы зводныя мэтавыя паказчыкі дзяржаўных праграм, - сказаў Раман Галоўчанка. - Што датычыцца авіяцыйнай галіны, яна працуе ва ўмовах, звязаных з абмежаваннямі ў адносінах да авіякампаніі "Белавія" і іншых авіяперавозчыкаў Беларусі. Сітуацыя ў авіяцыйным сектары застаецца ўстойлівай. І вынікі работы галіны за 9 месяцаў паказваюць яе ўстойлівае функцыянаванне". Прэм'ер-міністр удзяліў асаблівую ўвагу знешнеэканамічнай дзейнасці ў сферы транспарту. "Транспартныя паслугі, з улікам трубаправоднага транспарту, па-ранейшаму з'яўляюцца адной з асноўных крыніц паступлення ў краіну валюты і фарміруюць больш за 40 працэнтаў агульнага аб'ёму экспарту паслуг і дадатнага сальда знешняга гандлю паслугамі. Ключавы паказчык эфектыўнасці работы Мінтранса - экспарт транспартных паслуг - за студзень-жнівень склаў 119 працэнтаў да адпаведнага перыяду 2020 года. Але дадатную дынаміку неабходна нарошчваць", - падкрэсліў ён. Раман Галоўчанка адзначыў, што ў транспартнай сферы ёсць яшчэ шэраг актуальных пытанняў, якія патрабуюць увагі. У іх ліку забеспячэнне патрэбнасцей грузаадпраўшчыкаў краіны ў перавозках грузаў чыгуначным транспартам, функцыянаванне сферы сацыяльна значных перавозак пасажыраў у рэгулярных зносінах, развіццё воднага транспарту, павышэнне яго эфектыўнасці і канкурэнтаздольнасці, утрыманне і абнаўленне рухомага саставу, развіццё інфраструктуры перавозак. Таксама на пасяджэнні Прэзідыума Савета Міністраў абмяркоўвалася гатоўнасць галіны да рэалізацыі важнейшых інвестыцыйных праектаў. БЕЛТА