Лукашэнка сабраў нараду па пытаннях забеспячэння бяспекі і ахове граніцы

Аляксандр Лукашэнка адзначыў, што абстаноўка вакол Беларусі застаецца складанай. Паблізу граніц нарошчваецца ваенны патэнцыял НАТА, адбываюцца правакацыі на граніцы.

"Адкласці гэту нараду мы не маглі: абстаноўка нас вымушае рэагаваць на тую сітуацыю, якая складваецца. Таму было даручана ўраду, сілавому блоку падрыхтаваць сур'ёзныя мерапрыемствы на граніцы з мэтай недапушчэння на тэрыторыю Беларусі розных дыверсантаў. Апошнім часам такія выпадкі сталі больш частымі. Таму я хацеў бы пачуць вычарпальныя прапановы па процідзеянні", - сказаў Аляксандр Лукашэнка.

Як далажыў у час нарады старшыня Камітэта дзяржаўнай бяспекі Іван Тэртэль, на аснове даных, што паступаюць па лініі разведкі і іншых падраздзяленняў, прагназуецца значнае абвастрэнне аператыўнай абстаноўкі, што складваецца вакол Беларусі.

У ліку асноўных дакладчыкаў таксама выступілі міністр унутраных спраў і старшыня Дзяржаўнага пагранічнага камітэта. Нарада мела закрыты характар, таму ўсе даклады таксама прайшлі ў закрытым рэжыме.

Пасля нарады ўжо Іван Тэртэль растлумачыў журналістам, на аснове чаго Камітэт дзяржбяспекі прагназуе значную эскалацыю абстаноўкі па перыметры Беларусі. "Гэта звязана, па-першае, з тэмай баявых дзеянняў на паўднёвым напрамку. З гэтым усё цяпер звязана. І другое - не спыняюцца спробы дэстабілізаваць сітуацыю ўнутры нашай краіны. Гэта перш за ўсё цэнтры за граніцай, якія плануюць гэту дзейнасць пры падтрымцы непасрэдна куратараў, таксама з ліку замежных спецслужбаў. Плануецца шэраг такіх сур'ёзных акцый на нашай тэрыторыі. Спонсары не даюць магчымасці іншага выйсця для тых, хто ўжо трапіў у іх залежнасць. А спонсары - гэта замежныя зацікаўленыя асобы - як фізічныя, так і спецслужбы і іншыя арганізацыі. У гэтых умовах кіраўнік дзяржавы распарадзіўся, каб мы далажылі прапановы па рэагаванні на гэтыя ўсе выклікі", - сказаў кіраўнік КДБ.

Паводле яго слоў, у бліжэйшы час таксама будуць абнародаваны новыя факты затрыманняў і вынікі работы контрразведкі. "У нас кожны дзень ідзе ціхая работа. Яе кіраўнік дзяржавы асабіста кантралюе, ведае ўсе нюансы. У бліжэйшы час (тыдзень-паўтара) мы пакажам вынікі гэтай работы. На жаль, не ўсе нашы грамадзяне яшчэ ўсведамляюць тую небяспеку, якая складваецца вакол іх, вакол іх сем'яў. Таму мы на прыкладзе ўжо рэальных матэрыялаў, рэальных затрыманняў, работы контрразведкі, работы падраздзяленняў па абароне канстытуцыйнага ладу, якія прадухіляюць тэракты, пакажам вось гэтыя прыклады для таго, каб нашы людзі разумелі, з чым мы маем справу", - сказаў Іван Тэртэль.

Старшыня Дзяржпагранкамітэта Анатоль Лапо ў сваю чаргу расказаў, што на нарадзе Прэзідэнту было даложана, як складваецца абстаноўка на граніцы і як у сувязі з гэтым фарміруюцца манеўраныя групы, якой тэхнікай аснашчаюцца падраздзяленні на граніцы. "Мы ў мінулым адну мангрупу сфарміравалі ў мазырскім атрадзе (гэта каля 300 чалавек), цяпер абстаноўка такая, што мы вымушаны фарміраваць адну мангрупу на лідскім напрамку, другую, як рэзерв, - на брэсцкім напрамку. Будзе восень - магчыма, яны там не патрэбныя будуць, будзем перакідваць на іншы напрамак, - расказаў старшыня Дзяржпагранкамітэта. - Абстаноўка на граніцы прагназуемая і кантралюемая".

БЕЛТА