Андрэйчанка: недапушчальнасць скажэння гісторыі і гераізацыі нацызму трэба замацаваць заканадаўча

7 снежня, Мінск /Кар. БЕЛТА/. Неабходна заканадаўча замацаваць недапушчальнасць скажэння гісторыі і гераізацыі нацызму, заявіў старшыня Палаты прадстаўнікоў Уладзімір Андрэйчанка ў час круглага стала "Гістарычная памяць: генацыд беларускага народа", перадае карэспандэнт БЕЛТА.

"Наша мерапрыемства з'яўляецца лагічным працягам дзейнасці парламента па заканадаўчым забеспячэнні абароны фундаментальных каштоўнасцей беларускага народа. Шырокі грамадскі дыялог, які прайшоў у Рэспубліцы Беларусь, выявіў патрэбнасць у замацаванні на ўзроўні Канстытуцыі і ў заканадаўстве недапушчальнасці скажэння гісторыі і гераізацыі нацызму", - сказаў Уладзімір Андрэйчанка.

Спікер нагадаў, што шэраг такіх дакументаў прыняты ўжо. "Чарговым крокам у гэтым напрамку стане разгляд праекта закона "Аб генацыдзе беларускага народа", падрыхтаванага ў адпаведнасці з даручэннем кіраўніка дзяржавы дэпутатамі сумесна з Генеральнай пракуратурай, - адзначыў ён. - Бачыцца сімвалічным, што наш круглы стол праводзіцца напярэдадні чарговай гадавіны з моманту прыняцця Асамблеяй ААН Канвенцыі аб папярэджанні генацыду і пакарання за яго".

Уладзімір Андрэйчанка падкрэсліў, што вынесеныя на абмеркаванне пытанні маюць выключную важнасць для нашай краіны, постсавецкай прасторы і для ўсяго свету на гэтым гістарычным вітку яго развіцця. "Гібрыдная вайна супраць Беларусі, акты насілля з боку польскіх улад у адносінах да бежанцаў, нежаданне Еўрасаюза прызнаць праўду аб прычынах міграцыйнага крызісу, ваенныя падрыхтоўкі НАТА не пакідаюць сумненняў, што свет падышоў да вельмі небяспечнай рысы", - дадаў ён.

Сёння ў Палаце прадстаўнікоў праходзіць круглы стол "Гістарычная памяць: генацыд беларускага народа". У ім прымаюць удзел прадстаўнікі Генеральнай пракуратуры, Міністэрства абароны, Нацыянальнай акадэміі навук, Беларускага інстытута стратэгічных даследаванняў і Нацыянальнага архіва Рэспублікі Беларусь.

БЕЛТА